Íslendingar í SS
Kunnugt er um níu menn af íslensku bergi brotna sem þjónuðu í SS-sveitum Hitlers. Þeir voru:
Björn Sv. Björnsson (Fæddur í Reykjavík 1909. Hóf störf hjá umboðsskrifstofu Eimskips í Hamborg árið 1930 og rak frá miðjum 4. áratugnum eigið fyrirtæki þar í borg, til ársins 1938, en vann um skeið eftir það í Danmörku. Vorið 1941 hóf hann störf hjá þýskri verksmiðju í Hamborg og gerðist sjálfboðaliði í Waffen-SS síðsumars 1941. Sendur til starfa hjá stríðsfréttaritaradeild SS í ársbyrjun 1942 og til austurvígstöðvanna í kjölfarið. Hækkaður í tign og gerður að SS-Sturmmann vorið 1942 og að nýju um haustið, þegar hann varð gerður að SS-Unterscharführer, og gekk í framhaldinu í foringjaskóla hjá Waffen-SS í Bad Tölz. Þegar hann stóðst loks próf var hann enn hækkaður í tign og gerður að SS-Oberscharführer. Hann var í kjölfarið gerður að yfirmanni útibús stríðsfréttaritaradeildar í Kaupmannahöfn. Sumarið 1944 var hann hækkaður í tign upp í stöðu SS-Untersturmführer. Um haustið hertók hann hús danska útvarpsins með valdi, að fyrirmælum yfirboðara sinna, og var útvarpsstjóri þar um hríð. Einnig ritstýrði hann harðskeyttu SS-áróðurstímariti er út kom á dönsku og kom á stuttbylgjusendingum til Íslands. Sat í fangelsi í Danmörku í eitt ár að stríði loknu. Komst til Íslands með fiskibáti í júní 1946, með viðkomu í Svíþjóð. Hann bjó síðan um langt skeið í Argentínu og öðrum löndum en fékkst síðan m.a. við kennslu hérlendis. Hann lést 1998.
Geir Þorsteinsson (sjá grein).
Gunnar Guðmundsson Fæddur 1917 í Reykjavík. Kom til Danmerkur vorið 1941, eftir ævintýralegt ferðalag um hálfan hnöttinn. Var í fyrstu í þjónustu þýsku leyniþjónustunnar í Kaupmannahöfn við að afla nýrra liðsmanna. Gerðist sjálfboðaliði í fréttaritaradeild SS í byrjun júlí 1944, en leystur frá störfum í byrjun mars 1945, eftir nokkurra mánaða veikindi. Flutti til Íslands sumarið 1946 en rak síðan frímerkjasölu í Kaupmannahöfn, en frá 1960 sölumiðstöð fyrir kínverskar vörur. Dánarár óvíst.
Hólmsteinn Kristjánsson Sonur Sigurðar Kristjánssonar ritstjóra og danskrar konu. Búsettur í Danmörku en íslenskur ríkisborgari að því er virðist. Lést 1945, 18 ára gamall.
Jón Óli Strömberg Karlsson Fæddur 1910 á Akureyri. Lærði rafvirkjun í Þýskalandi og starfaði sem slíkur hjá Bauleitung der Polizei und Waffen SS frá vorinu 1942. Vann m.a. við byrgi er tengdust varnarlínum Þjóðverja á Atlantshafsströnd Frakklands, en fór að því búnu til starfa í útibúi Sachsenhausen-þrælabúðanna, er kallaðist Bad Saarow. Sigldi með Lagarfossi til Íslands í ársbyrjun 1946 og starfaði sem rafvirki á Akureyri þar til hann lést úr raflosti í júní 1948.
Karl Christian Christensen Fæddur á Húsavík 1919. Stundaði þýskunám í Hamborg 1940-42 ásamt því að skrifa fyrir þarlent blað og SS-tímarit það er Björn Sv. Björnsson ritstýrði. Gerðist í júlí 1944 sjálfboðaliði í fréttaritaradeild SS sem Carl Kr. Christensen og var í Þýskalandi til vorsins 1945. Starfaði um tíma við stuttbylgjusendingar til Íslands. Komst til Íslands með Esju í júlí 1946. Íslenskaði nafn sitt í kjölfarið og undir nafninu Karl K. Kristjánsson rak hann samnefnt fyrirtæki um áratugaskeið hérlendis. Hann lést í janúar 1996.
Magnús Hansson Bjó í Kaupmannahöfn. Fæddur 1924. Ekki staðfest hvenær hann gekk til liðs við SS. Dánarár óvíst.
Odd Thordarson Odd Thordarson, fæddur í Bergen, sonur íslensks manns og norskrar konu. Innritaðist í Waffen-SS árið 1941, lést í Eistlandi 1944.
Sölvi Friðriksso n Innritaður í SS sem Sölvig Fredrikson. Fæddur í Vestmannaeyjum 1917. Gekk í Waffen-SS í árslok 1941 eða ársbyrjun 1941, þjónaði í Kampsgruppe Nord-sveitinni, síðar nefnd SS Gebirgs-Division Nord. Starfaði í hinum illræmdu Neuengamme-fangabúðum skammt frá Hamborg frá haustinu 1942 til vors 1943, fór þaðan á austurvígstöðvarnar og þjónaði að lokum í þrælkunarbúðunum Dora-Mittelbau, þar sem V-2 flugskeytin voru framleidd. Starfaði lengst af að stríði loknu sem kafari á Íslandi. Lést í Reykjavík árið 1993.
http://www.mbl.is/greinasafn/grein/1060851/